غبائي الاجتماعي

تنتابني حاله غريبه من الغباء الاجتماعي في بعض الأحيان، في مواقف معينه ترتسم ابتسامه بلهاء على وجهي وأصبح كتله من الغباء الاجتماعي، مع العلم أني اتمتع بحياه اجتماعيه مزدهرة، وفي اغلب الأوقات اتصرف بحكمه وإتزان،  ولكن في مواقف معينه بتمنى ييجي النمل يسحبني..

قبل شهر تقريباً توفي والد أحد زملائي في المدرسه، عندما سمعت خبر وفاته أردت أن اتصل فيه للتعزيه ولكن أجلت الموضوع حتى يخلص العزاء وبعديها نشغلت بالشغل وبعد مرور اسبوعين قلت خلص هلأ إلي حكى حكى! المشكله إنه مبارح شفت الشاب بالصدفه وستحيت من حالي وأنا بسلم عليه وبعزيه، يعني هلكلمتين كان ممكن أحكيهم عل تلفون.. اعتذرت منه لعدم الإتصال وقدمت له التعزية وسألته عن أحوال اخوانه وإنتهى الحوار بعد أن وجدت نفسي في موقف سخيف.. هذا ليس موقف صعب أو محرج ولكن تفكيرنا وتعاطفنا الإنساني يجعلنا نعتقد إنه موقف صعب، فنحن نعتقد أنه فالموقف الشديدة مثل الوفاه يجب أن يكون كلامنا مؤثراً ومعبراً بقدر صعوبة الموقف، لكن فالواقع كل ما هو مطلوب منا أن نقدم كلمات تعزيه بسيطة يشعر بها أهل المتوفي وليس علينا تقديم خطب وعبارات مؤثرة..

خلال سنين الجامعة قررت أن أعمل تطوعياً  مع الأطفال المعوقين جسدياً، فكنت أروح بعد المحاضرات إلى المركز فينتابني مغص غريب وحاله من التلبك المعوي مع وجع راس، وكانت تزداد هذه الحاله عندما يأتي أهالي الأطفال ويحدثوني عن تقدم ابنائهم الملحوظ، فترتسم على وجهي إبتسامة الشفقة الغبيه، وأشعر أن الابتسامه لا تخفي الإكتئاب والحزن الذي يصيبني كل ما أدخل من باب المركز، الحمدلله إنه مديرة المركز لاحظت التخلف إلي أنا في وقالتلي أروح أدور على عمل تطوعي يلائمني أكثر.. إليوم وأنا بحضر “وراء الشمس” لاحظت إنه بنت أختي شعرت بالإنزعاج بسبب الشخصيات المعوقة عقلياً أو جسدياً في المسلسل، وأنا الأن بصدد أن أجد وسائل لتقليل حساسية بنت أختي من الأشخاص المعوقين.

تصيبني حالة البلاهة عندما تجتمع كل العائلة ويسألوني عن موعد زفافي، وعندما تقف إحدى صديقات أمي وتوجه لي سلسله من الإطراء الذي لا ينتهي، فترتسم مجدداً إبتسامة الغباء وأشعر لسبب ما بالضغط، فعماتي ينتظرون موعد زفافي، بجوز جاي عبلهم يرقصوا أو بجوز قاعده ع قلوبهم.. والأن دخلت منافسه مع نفسي وعلي أن احافظ على مظهري الأنيق في كل مرة تزورنا صديقات أمي.. مواقف سخيفه جداً، مش عرفه ليش هلأد بتدغطني..

هذا جزء من التخلف الإجتماعي الذي أعاني منه، لكل منا عقد ومشاكل نفسيه نحملها منذ الصغر، مجتمعنا حشري وكل انسان يعرفنا من قريب أو من بعيد يتدخل ويسأل عن تفاصيل حياتنا، كل انسان لازم يعلق ولازم يكون لديه رأي معين، كل شخص عنده توقعات معينه ونحن نعيش لنحقق هذه التوقعات..

12 responses to “غبائي الاجتماعي

  1. كل انسان بمر بهالفترة, هو مش غباء اجتماعي, هو حاله ملل و كسل عام بتشمل حتى ردود افعالنا , فبنفقد السيطره على حاله الاتزان اللي بنحاول نضل ماشيين عليها

    ارضاء الناس غايه لا تدرك…بعد فترة من الزمن بتلاقي اهمية ارضاء الناس بتقّل عندك

    بتزكر بابا وماما بس كنت كتير اتأثر بموقف معين و احسه محرج يحكولي : بكره بتكبري وبتتغيري” و شكله فعلا كبرت🙂
    مع ان في ناس لسّا بيجو عالعصب عندي

    الله يهدّي البال و يمرّق هالفترة على خير🙂
    رمضان كريم..وكل عام وانت بالف خير🙂

    • وإنت بألف خير وسبر..
      فعلاً إرضاء الناس صعب جداً، مرات بتخيل حالي بنفجر غضب وبصرخ بكل حدا بدق ع عصبي، بجوز إبتسامة البلاهة أحسن🙂

      الله يسمع منك يا رب وأبطل أتوتر بحي المواقف..

      رمضان كريم والله يتقبل طاعتكم.

  2. ذكرتيني بحالي يالله شو عندي غبا!!
    بتعرفي مرات بحس زي ما حكيتي المشكله بالمجتمع اللي بيخيليك ع اعصابك ودايما مستنفره
    بس بحب احكيلك انو قليل من الغبا لا يضر وكثير من التطنيش ايضا

    الله يتمم لك ع خير:)

    • مساء الخير مياسي،
      الغباء أكيد موجود عند كتير ناس، الحمدلله إنه الغباء إلي عنا يحتمل.. والله شكله الواحد لازم يطنش ويمشي..

      شكراً يا قمر الله يسعدك ويهنيكي يا رب..

  3. صدقيني ماتمرين به ليس غباء أو تخلف اجتماعي بل على العكس إنها ثورة بدأت تنشب في داخلك ترفض الدوران في حلقات أحداث المجتمع

    كل الود

    • مساء الخير أشرف، كيفك؟

      والله شكله مافي مهرب من هذا المجتمع إلي بفرض عليك وبتوقع منك أشياء ما إلها أول من أخر.. الله يقدرنا ع خدمة المجتمع ؛)

      أشرف أنا ما عام بقدر أفوت ع مدونتك صرلي يومين بجوز..

  4. Haitham Al-Sheeshany

    لا تخلف ولا شي 🙂

    بتوقع السبب بمثل هذه المواقف هو عدم التواصل الصريح فيما بيننا
    نرغب في تحقيق سقف التوقعات سواء الذي وضعناه لأنفسنا أو وضعه الآخرون لنا
    تجنبا ً للإحراج + الألم

    *كتبت تعليقا ً قبل دقائق و لم يظهر، فكتبت مرة أخرى … إذا ظهر الإثنان فعذرا ً + لن أدفع مصاريف زيادة يعني
    فلا تحاولي😀

    • هيثم ما تخاف، مافي ضريبه عل تعليق هنا🙂 منطقة حرة الله وكيلك..

      احكيلك اشي،

      I don’t have any expectations from anyone so I wouldn’t be disappointed.. why do people – friends and family – have a large set of expectations for me?

      have a good night my friend

  5. I had to be sure bcoz taxation is getting popular u know😉
    They have expectations bcoz they r programmed so! Know what I mean ?

    Have a gr8 night.

    H.

  6. مساء الخير
    بالنسبه للتلفون …هذا مش غباء اجتماعي…هو كسل ربما لكن بتصير معنا كلنا خصوصا اذا اجلتيها …فأحسن طريقه حتى ما تنحرجي مره تانيه …تمسكي التلفون بنفس الدقيقه وما تحاولي تأجلي لانك اكيد حتنشغلي وتنسي الموضوع.

    اما موضوع التوقعات …عجبني سطرك الاخير …نحنا بنعيش حتى نحقق توقعات كل شخص منا …هذا بالظبط سبب مشاكلنا مع انفسنا …ليش؟ ليش بيهمنا رأي الناس فينا وتوقعاتهم لهالدرجه؟
    وشو بيصير يعني لو خاب املهم وتوقعاتهم ما تحققت؟؟؟
    أكيد لما تكبري اكتر …حتخف حساسيتك ويجي وقت تبطلي تهتمي كتير بارضاء من حولك على حساب ما يرضيكي انتي …بالاخر معظم الاشياء اللي بتسمعيها منهم هي “كليشيهات” بيرددوها بدون تفكير .

  7. أهلاً وسهلاً بنيسان،
    نورتينا🙂

    بحس في أشياء معينه الكل بحب يتدخل فيها، توجيهي، شو بدك تدرسي بالجامعة، عنا بالعيله في موضوع الماجستير كمان، الزواج، وأخيراً أول مولود.. ما بعرف هي الأمور مهمه كتير ليش، ما عمرو حدا سألني شو بتشتغلي، مبسوطة بالشغل ولا لأ، ما بعبروا عن أي فخر باني شغلي ممتاز..

    شكراً عل زيارة اللطيفه🙂

  8. I have the exact same problem i.e. lack of social intelligance. Its frustrating I know…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s