صراع البقاء في شوارع عمان

كل يوم لما بسوق في شوارع عمان الحبيبة بحس بعمري عام يقصر شيئاً فشيء.. غير الازمه والإزدحام إلي فالشوارع، والمشاه إلي بيقفزو إنتحاري، والسيارات إلي بتصف مسربين وهو الشارع بكون مسرب واحد، ومواكب الأعراس إلي بتسكر الشوارع، وحافلات النقل العام و سيارات التكسي إلي بتدور ع ركاب، ول سيارات الوافده من دول الخليج ما بلاحظو إنه شوارع عمان أضيق من شوارع الخليج، غير الشبان إلي بمنتهى الطيش بتسابقوا بنص الشارع، إذا هو حابب ينتحر لزم كلنا ننتحر معو، ولسكوتر إلي بكون طاير مفكر حالو شاحنه مع إنه فعلاً أقل نسمه ممكن تطيرو!

أغلب الشوارع في الأردن مسربين، المسرب اليمين طبعاً محجوز لمن يبحث عن مكان للاصطفاف، بما إنو مافي عمارة بهالبلد بتحسب حساب لعدد مواقف كافي، ليش يعملو مواقف؟ أوفرلهم يدفعو غرامة عدم كفاية مواقف للأمانه ويستخدمو كامل المساحة للمكاتب ولمخازن، بضل عنا المسرب الشمال، مكسر ومحفر ألف مرة لتمديدات المياه ولمجاري وتصريف المياه، طبعاً بنحفر الشارع كل بداية شتويه وكل نهاية شتويه، فأغلب السنه بكون محفور وبكون الشارع مسرب واحد، أكيد في جهة معينه بتستفيد من قصة حفر الشوارع، ما اتوقع كل هذا سوء تنظيم وضعف في تنفيذ المشاريع! ع كل حال مسرب الشمال المحفر بدك تسوق في وإنت ملزق باللي قدامك إذا تركت مسافة أمان فسيأتي إلي وراك ليملأ هذا الفراغ إلي متروك عبثاً! كل ٥٠ سنتيمتر بينك وبين إلي قدامك يأتي شخص أخر ويدحش حالو فيها. طبعاً إلي وراك ماشي أسرع منك، فياويلك تضرب بريك فجائي! وإنت ماشي بسباق مع الزمان و-١٠ سنتيمتر قدامك و-١٠ وراك، بيجي واحد من المصطفين عل يمين مشان يفوت بهذا السباق معك، وإنت الله لا يردك، تطلع فوق الرصيف، تخبط بالحيط مين سائل فيك!

بعد الصراع مع السيارات، بتبدأ حرب الأعصاب مع المشاه إلي مستحيل يستخدمو جسر أو نفق المشاه، ول أحلى مجموعة المشي السريع إلي بيمشو بأكثر شوارع عمان إزدحاماً، ول أجمل من هذا كلو جديد شوارع عمان أولاد يافعين على عجلات تزلج، يحلقون في شوارع عمان، شفتهم يهورون على نزله في جبيهة، ويتسحسلون من الدوار الرابع إلى جسر عبدون ويتمسكون بمؤخرة السيارات في منطقة خلدا، صراحة جداً خفت من هذه المجموعة من الأطفال، ماشالله عليهم شو جريئين مش لابسين خوذه ولا اشي، وماسكين بالسيارة، ومسرعين بين سيارات طايره، مختفيين وراء الكوربات، شو راح يصير لو الشخص إلي مسكوا بسيارتو دعس بريك فجأة، لو ولد طار، أو مات أو تكسر، وين أهلهم عنهم؟ وين الشرطة تلمهم همه وأهلهم؟ ولا بنستنا شخص مسكين يتشحطط بالسجون والجاهات ولعطوات بسبب ولد اهلو مش سائلين في ومفكر حالو سوبر مان نازل كمكازي يتزلج في نص شوارع رئيسيه؟!

أداب السير بالأردن معدومه والحمد لله، فعلاً كل مرة بطلع بسيارتي وبوصل على وجهتي سليمه بتشهد وبحمد ربي ألف مرة.

12 responses to “صراع البقاء في شوارع عمان

  1. مش معقول قديش ضحكت لما قرأت كلمات صار لي سنين مش سامعها. صار لي فعلا عمر مش سامع كلمات زي “يتسحسلون” و “يتشحطط” و “نازل كمكازي”:)ـ
    مين قال انه الشعب الأردني كشر؟
    يعني لو انك ما بتعاني من السواقه بالأردن ما كان طلع معاك هاذ الحكي :)ـ
    بس فعلا زي ما بتوصفي هاي مش حياه عاديه هاي حرب اذا الواحد لازم يكون حذر على محيط 360 درجه السواقه زي هيك بترفع الضغط

  2. Pingback: Tweets that mention صراع البقاء في شوارع عمان « Blabbrgirl's Blog -- Topsy.com

  3. نسيتي تحكي عن باصات المؤسسه اللي بتمشي وبتوقف ولا كانو في سيارات تانيه بالشارع
    ولا اللي بكون صافف مدوبل مع انو في مصف بعة ١٠ متر، بس حرام بتعب من المشي.
    ولا اللي بكون ماشي عكس السير وطاير لانو اللفه اللي بدو ياها بتزيد عليه ٢٠ متر.
    واللي واللي واللي … عنجد بتقصر العمر

    • والله في أشياء كتير ما حكيتها فعلاً الناس عجبه بالسواقة.. وكل هي التصرفات الخطيرة موجوده ولشرطة بشوفوها، بس شكلهم ما تعلمو غير يكتب مخالفة الوقوف ولتوقف!

  4. نسيتي الحيوانات الي بتشارك بالصراع. يعني نفسي اسوق بشارع و ما تنطلي “قطقوطة” حابة تستعرض انه عندها 9 رواح قدامي. وكمان بما انو ركوب الخيل من العادات العربية الاصيلة فما شاء الله صرنا نشوف الفرسان بكل مكان بزاحموا بالشوارع متل السيارات.😛
    بوست جميل!

  5. Haitham Al-Sheeshany

    كلماتك شخصت الواقع بدقة ، للأسف هذا ما يحدث كل عام.
    أنا خارج البلاد هذه الإجازة بس بصراحة تعالي شوفي هون كيف السواقة! كل طلعة مغامرة😦

    كل مرة بكتب وصية جديدة🙂

  6. تصوير جميل ودقيق جدا لواقع صراعات البقاء في شوارع عمان واتفق معك تماما على كل ماقلتي ولكن
    طالما الالتزام الداخلي للسائق معدوم فلن تجدي نفعا كل تسهيلات
    شبكة المواصلات التي من الممكن عملها وهنا من وجهة نظري أساس المشكلة

    نهارك سعيد

  7. معك حق أشرف، المشكله مو بس بالشوارع، كمان الناس بتسوق بدون أخلاق.. مش عارفه ليش الناس هلأد بياخدو موضوع السواقة بشكل إنفعالي، الكل معصب ولكل شادد ع حالو، بجوز لو يسترخوا شوي تتحسن الأحوال..

    نهارك أسعد أشرف🙂

  8. Haitham Al-Sheeshany

    إجازتي وقف التنفيذ للأسف ، حأظل في السعودية هالصيف.

    السواقة دائما ً أخلاق أولا ً و ذوق و النتيجة معروفة إذا المعطيات شبه معدومة!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s